OSCE

The OSCE

Objective Structured Clinical Examination

اختبار تطبيق لمهاراتك السريرية .. (اختبار مادة الكلنكال سكلز)

نسبة الاختبار 20% من درجة السنة عشان كذا المفروض ناخذه بعين الاعتبار .. بس ما يعني انه صعب!

كل شي اكتبه من وجهة نظري الشخصية ومما لاحظته مع البنات ومن السوالف معاهم قد تختلفون معي بها .. نصيحتي تقدرون 

تسالون اكثر من شخص عشان تعرفون ايش اللي يناسبكم 

قبل الاختبار

كيف استعد للاختبار؟

أولًا: خلال السنة حاول انك تكون منتبه بالتتوريال وطبق مع الدكاترة وحاول تجرب .. احيانًا الدكاترة ما يمديهم يشرحون كل شي 

او ينسون اشياء .. هذا مب يعني انها محذوفة ترا معاك!

ثانيًا: ترا كل شي بالتتوريالز مهم لا تستذكي وتطالع شي تقول فحص للظهر مستحيل يجي لا يجي بس البايشنت يكون لابس وتطبق كل شي وتقول كل شي..

ثالثًا: مهارات الترم الاول مهمة جدًا ، الاغلب يشد حيله بالترم الثاني والأول يعتمد على نفسه فيه .. لا فيه اشياء

 لو اعتمدت على نفسك فيها ممكن تجيب العيد مثل كيف تتعامل مع بايشنت غاضب وبريكينق باد نيوز وكيف تشرح حالة للمريض الى اخره.. بشكل عام ترى مرة حلو انهم يعلمونا هذي المهارات لانك صدق اشياء مرة نحتاجها بالمستشفى بالاخير احنا نتعامل مع بشر بموقع حساس..

رابعًا: الهستوري ثم الهستوري ثم الهستوري .. من اهم واعظم مخرجات سنة ثانية ! للاسف من وجهة نظري مع ان اغلب الترم الاول عليه الا احس اننا ما عرفناله صح الا قبل الاختبار .. مثلًا انا ما كنت ادري اني لازم احفظه .. متوقعة بيصير معي فورم دايمًا واعبيه..

بعدين اكتشفت ان حتى الترتيب مهم !! يعني ما تنقز من سوشال هستوري لميدكال لعندك حساسية بعدين سرجكال! رتبوا مخكم بالترتيب!

خامسًا: التدريب مهم جدًا جدًا جدًا

حاول تتدرب اكثر من مرة مع اخوانك الصغار أو اي احد ! التدريب راح يزيد ثقتك بقدراتك ويخفف عليك اي توتر قد ينوب 

عليك في لحظة ما.لا تمشون قراءة لو سمحتوا اختبار تطبيقي طبق!

يوم قرب الاختبار قررت اشتري الأدوات مثل جهاز الضغط والسماعة وو .. 

يوم صاروا عندي تمنيت اني شريتهم ابكر لان مرة حلو تتدربون عليهم حتى بنفس التتوريال لان عدد الادوات اللي تنجاب من القسم تكون طبعًا قليلة

بس أغلب البنات ما كان عندهم وعادي ما أثر وتدربوا من اشياء بعض..شي راجع لرغباتك الشخصية.

افتحوا اليوتوب وقلدوا ايش يسوون من كيف يسلمون عالبايشنت إلى الملخص اللي يعطونك اياه.

Geekymedics

 قناة باليوتوب ممتازة ومفيدة لتتوريالز الترم الثاني، بس عمومًا اي اكزامنيشن بتلقون له فيديو.

بيسوون الجامعة اختبار تجريبي قبل الاختبار الصدقي بفترة اعتقد كانت بالنسبة لنا اسبوعين .. بيوضح لكم كل اللي قاعدة اكتبه.

أثناء الاختبار

 أي لغة استعمل اثناء الاختبار؟

براحتك، شخصيًا استعملت العربية لان بالمستشفى بتكلم بالعربي.. ممكن في بعض الحالات يكونوا الدكاترة غير ناطقين باللغة 

العربية فتحتاج تتكلم انجليزي

* الدقيقتين ما قبل السيشن

مهمة ومفيدة جدًا جدًا ! حاول تكتب فيها كل شي تبغى تسويها باختصار حتى لو تسويلك حروف او رموز .. لا تحاول تكتب جمل ما يمدي! 

اقرأ السؤال والمطلوب منك جيدًا .. فهم السؤال نصف درجة الاجابة فلا تسوون مستعجلين بزيادة وتقرون باللمح لا ركزوا..

في كل حالاتك خلك واثق من نفسك .. لا تبين لاحد انك مرتبك او شي .. اذا حسيت ان مخك مشوش خذلك دقيقة اكتب وش تبي تسوي.

*اثناء السيشن

سو اللي تتذكره وخلك هادي ومهدي اعصابك ان شاءالله الوقت بيكفي بس لا تصيرون ثلج مرة وحدة..

خلصت ثم تذكرت شي ممكن تقول للي يقيمك وتطبقه ما اعرف صراحة هل يحسبونه او لا بس بالنسبة لي أؤمن بزود ولا نقص

لا تخوفك تعابير وجه الدكتور وتحسب نفسك محفل، ترا عادي هم طفشانين شافوا مية شخص يسوون نفس اللي تسويه  مب انت المشكلة..

*بعد السيشن

فرضًا حسيت انك ما سويت كويس بالسيشن اللي قبل انتبه تخليه يسيطر على تفكيرك ووتخربط بالسيشن اللي بعده .. قدر الله وماشاء فعل ربك رحيم ان شاءالله وتوكل على الله وشف اللي قبالك انسى اللي سويته.

*بالليلة اللي بين اليومين

لا تتحطم اذا راجعت مع الطلاب وحسيت انك ما سويت كويس وخلاص تفقد الامل وليش اتعب نفسي.. ترا عاااادي جدًا تحسب انك جايب العيد ونسيت تطبق اشياء كثير وبالاخير درجتك مب شينة .. وممكن اليوم الثاني يكون اسهل بكثير لو انك مراجع وترفع درجتك بالسما..

أخيرًا :

شخصيًا اعتبر الاختبار اسهل بكثير من الورقي لان الماتيريال محدود .. ما يحتاج له ذاك الاستعداااااد بس حلو انك يكون عندك فكرة كيف بيكون الاختبار من بدري .. احنا فوجئنا بان انحذف اسبوعين من الدراسة والكثير ما قد فتح الماتيريال مع ذلك تكيفنا والحمدلله ..

هذا ما لدي ان شاء الله ما اكون نسيت شي .. ان اصبت فمن الله وان اخطأت فمن نفسي والشيطان ، دمتم بخير.